Starfsdagar

Námskeiðið er samstarfsverkefni Sögu – Story House og Þekkingarmiðlunar.

Starfar þú við að þjónusta annað fólk? Að þjónusta fólk er bæði gefandi og krefjandi. Þar ert þú verkfærið sem brýnt er að hlúa vel að. Sjálfsþekking er valdeflandi leið til að blómstra í starfi og takast á við álag og streitu á uppbyggilegan hátt.

Markmið
– Að hlúa að fólki sem starfar við að hlúa að öðru fólki.
– Að nemendur læri aðferðir sem stuðla að aukinni sjálfsþekkingu, seiglu og endurheimt til að takast á við álag í starfi á valdeflandi,  uppbyggilegan og aðgengilegan hátt.
– Að nemendur geti yfirfært aðferðir og þekkingu á daglegt líf.

Áherslur fræðslu
Teygjusvæðið
Örugga svæðið, teygjusvæðið og hættusvæðið. Módel sem hjálpar þér að skilja sjálfa/n þig, samstarfsfólk þitt og fólkið sem þú þjónustar. Módel sem hægt er að yfirfæra yfir á heimili, starfsstaði og samfélög með áherslu á valdeflandi viðhorf: Hvernig hanna ég mínar áskoranir og endurheimt í daglegu lífi og starfi?

Núvitund í starfi og daglegu lífi
Jákvæð áhrif skynjunar, skynúrvinnslu á líðan og lífsgæði.

Næring í starfi
Að verja starfsorku þína og viðhalda jafnvægi. Huga að leiðum sem sporna gegn neikvæðum áhrifum álags og streitu á krefjandi tímum með því að skoða það sem nærir þig í starfi og gefur endurheimt.

Djúpslökun
Leidd djúpslökun í lok tímans með áherslu á endurheimt og streitulosun.

 Hugmyndafræði og kennsluaðferðir
Námskeiðið er byggt á hugmyndafræði iðjuþjálfunarfræða, jákvæðri sálfræði, reynslunáms (experiential learning), umhverfissálfræði og hugmyndafræði djúpslökunar. Notast er við fjölbreyttar kennsluaðferðir með áherslu á virka þátttöku nemenda.

Starfsmannahópar
Fólk fyrir Fólk er einnig í boði fyrir starfsmannahópa, tímasetning og tímalengd sérsniðin að þörfum starfsstaða í samráði við stjórnendur.